Додека македонскиот шампион и во сезоната 2027/28 ќе зависи од евентуална вајлд-карта за настап во Лигата на шампионите, ситуацијата е далеку поповолна кога станува збор за Лигата на Европа. Новиот рејтинг на Европската ракометна федерација ѝ донесе на Македонија дополнителен бенефит во второто по квалитет европско клупско натпреварување.
Според клупскиот ранкинг на ЕХФ, кој ги опфаќа резултатите од сезоните 2023/24, 2024/25 и 2025/26, Македонија направи значителен исчекор. Нашата федерација се искачи од 14. на 10. место со коефициент 33.00, што носи уште едно место повеќе во Лигата на Европа.
Тоа значи дека доколку македонскиот шампион добие вајлд-карта за Лигата на шампионите, второпласираниот и третопласираниот тим од Супер Лигата директно ќе обезбедат место во групната фаза од Лигата на Европа.
Такво сценарио не беше можно за претстојната сезона. Иако постоеше надеж дека и Охрид ќе биде промовиран во Лигата на Европа, тоа не се случи, па Македонија остана со само еден претставник во групната фаза – Еурофарм Пелистер.
Новиот рејтинг, сепак, отвора многу подобри перспективи за македонските клубови во европските натпреварувања од сезоната 2027/28, бидејќи успешните настапи во изминатите три години донесоа значителен напредок на националната листа.
