Македонскиот репрезентативец и еден од најдобрите одбојкари во земјава, Александар Љафтов, официјално е нов играч на Штип УГД.
36-годишниот примач зад себе има богата интернационална кариера и повеќе од 15 години е еден од носителите на играта на македонската одбојкарска репрезентација.
Во текот на својата кариера Љафтов настапуваше за голем број домашни и странски клубови, меѓу кои се Работнички Фершпед, Галатасарај, Рибница Ваљево, Анагениси Деринејас, Саут Гас Спортинг, ПТТ Спор, Младост Рибола Каштела, Хебар Пазарџик, Консар Равена, Ал Ибтисам, Ал-Васл, Струмица, ПАОК, МАВ Елоре Фокскон и Бурган Спорт Клуб.
Љафтов беше еден од клучните играчи на македонската репрезентација која настапи на Европските првенства во 2019, 2021 и 2023 година. Со националниот тим освои три сребрени медали во Европската лига (2015, 2016 и 2017), како и сребро во Европската сребрена лига во 2021 година.
Со ангажманот на Александар Љафтов, Штип УГД добива огромно засилување и одбојкар со богато меѓународно искуство, кој се очекува да биде еден од лидерите на тимот во претстојната сезона.
