Третолигашот Дојранско Езеро од Дојран го промовираше новото лого и го назначи Кристијан Ристов за нов шеф на стручниот штаб, а го утврди и планот за подготовки.
Дојранско Езеро го промовираше новото лого – симбол кој ги обединува минатото, традицијата и богатата историја на клубот со современ и модерен визуелен идентитет.
„Ова не е само нов изглед. Ова е приказна за генерациите кои го граделе клубот, за навивачите кои секогаш биле неговата најголема сила и за иднината што заедно ја создаваме. Во секој детал од новото лого се испреплетуваат нашите корени, љубовта кон Дојран и амбицијата да чекориме напред, без никогаш да заборавиме од каде потекнуваме. Со почит кон историјата. Со поглед кон иднината“, велат од клубот.
Младиот Кристијан Ристов ќе биде нов тренер на дојранчани, а подготовките за новата сезона се закажани за 27 јули.
Како што во ексклузивна изјава соопшти Ристов, ќе бидат одиграни неколку пријателски натпревари низ кои ќе се проверува формата, а во тимот се вклучени неколку нови млади играчи на секоја позиција, а ќе има и неколку поискусни фудбалери, а ќе бидат вклучени неколку млади играчи од ФК Џокер на тренинг со сениорскиот тим на ФК Дојранско Езеро.
Ристов во изјавата за Спортска Мрежа зборуваше и за амбиции на клубот.
„На 27 јули ги започнуваме подготовките за новата сезона, во тимот се додадени нови млади играчи на секоја позиција, каде што ќе има засилување со неколку поискусни играчи, но и играчите од претходниот ростер исто така остануваат во клубот. Во моментов се договараат неколку пријателски натпревари, каде што некои ќе бидат и меѓународни. Плановите на клубот од оваа година ќе бидат да се обезбедат првите три места на табелата. Но, секако доколку се избориме за првото место нашиот приоритет би бил и Втора лига. Имаме млади засилување кои исто така потекнуваат од школата на ФК Џокер и играат низ неколку клубови во Македонија. Во моментот од ФК Џокер ќе тренираат и уште неколку млади играчи со првиот тим на Дојранско Езеро, каде што ќе може да го почувствуваат и тој дел да тренираат со првиот тим“, изјави новиот тренер на ФК Дојранско Езеро, Кристијан Ристов за Спортска Мрежа.
Новата сезона во Трета лига регион 3 треба да започне кон почеток на месец септември.
