Второлигашот Шкупи официјално ја заврши постапката за промена на сопственичката структура и со тоа отвора ново поглавје во своето функционирање. Клубот доби нов сопственик, откако Беким Бафтјари стана сопственик на 100 проценти од акциите.
Од клубот информираат дека процесот траел подолг период, бидејќи покрај стабилизацијата на клубот, било неопходно целосно да се завршат и сите административни и документациски процедури.
Со решавањето на сопственичката структура, раководството веќе ги насочува активностите кон новата натпреварувачка сезона. Подготовките за настап во Втората македонска фудбалска лига започнуваат во среда, а клубот постепено го комплетира планот за претстојните предизвици.
Од Шкупи потенцираат дека нема да даваат нереални ветувања, бидејќи наследените долгови остануваат сериозен товар кој ќе бара време и посветена работа за да биде надминат. Сепак, во клубот владее оптимизам дека со транспарентност, одговорен пристап и континуирана работа ќе се создадат услови за стабилно функционирање.
Во сезоната што следува, Шкупи ќе се потпира пред сè на фудбалерите од сопствената академија, додека стручниот штаб прифатил да биде дел од процесот на обновување и да помогне во еден од најпредизвикувачките периоди во поновата историја на клубот.
Воедно, од раководството упатија повик до сите поранешни членови, навивачи, пријатели и поддржувачи да се вклучат и да придонесат во враќањето на клубот на вистинскиот пат, нагласувајќи дека Шкупи е клуб кој им припаѓа на сите.
Со новата сопственичка структура и почетокот на подготовките, Шкупи ќе се обиде да постави цврсти темели за подобра иднина и успешен настап во новата второлигашка сезона.
Минатата сезона Шкупи како последнопласиран со еден бод испадна од Прва во Втора лига, по тешка и турбулентна сезона.
