Ракометниот клуб Бутел Скопје продолжува со комплетирањето на играчкиот кадар за новата сезона, а најново засилување во редовите на скопскиот тим е десниот бек Кристијан Стаменковиќ, кој потпиша договор на две години.
21-годишниот ракометар пристигнува од актуелниот шампион Вардар, каде што мина две успешни сезони и освои двојна круна. Пред трансферот во Вардар, Стаменковиќ настапуваше за Голден Арт, каде што беше препознатлив како еден од најдобрите стрелци во тимот.
Младиот десен бек зад себе има и настапи за кадетската и младинската репрезентација на Македонија, а во Бутел Скопје повторно ќе соработува со Стојанче Стоилов, кој од ова лето ја презеде тренерската функција во клубот.
Од Бутел Скопје веруваат дека Стаменковиќ со својот квалитет, искуство и потенцијал ќе биде значајно засилување во остварувањето на клупските амбиции во сезоните што следуваат. Со неговото доаѓање, скопскиот состав продолжува да го гради тимот кој ќе биде конкурентен на домашната ракометна сцена.
