Капитенот на машката сениорска репрезентација на Македонија, Војдан Стојановски, со оптимизам гледа на исходот од ждрепката за вториот круг од претквалификациите за ФИБА Евробаскет 2029.
Македонската селекција ќе се натпреварува во групата „Ф“, каде што за ривали ги доби репрезентациите на Австрија и Кипар. „Црвено-жолтите“ ќе одиграат вкупно четири натпревари, а целта е освојување на првото место кое води во квалификациите за Европското првенство.
Иако Македонија има позитивен биланс во досегашните пресметки со двете селекции, Стојановски истакнува дека тоа не смее да биде причина за опуштање. Според капитенот, потребен е максимално сериозен пристап, целосна посветеност и квалитетни настапи за да се исполни следната голема цел – пласман во квалификациите за ФИБА Евробаскет 2029.
„Би рекол дека, пред сè, најважно е да бидеме сите здрави, а уште поважно е да бидеме комплетни. Селекторот да ги има на располагање сите играчи, бидејќи има неколку кошаркари кои не беа дел од овој прв претквалификациски циклус, во кој остваривме максимален резултат.
Факт е дека имаме нешто полесни противници во втората рунда, но тоа е само на хартија. Во кошарката одамна нема лесни натпревари и фаворити однапред. Пред нас се нови четири средби, а ние мора да одиме чекор по чекор.
За разлика од овој циклус, во августовскиот ќе имаме помалку денови за подготовки. Но, доколку сме сите на број и го достигнеме вистинското ниво, верувам дека ќе имаме уште поголеми шанси да ја оствариме главната цел – пласман во квалификациите за следното Европско првенство“ – изјави капитенот на Македонија.
Македонската репрезентација во вториот круг од претквалификациите ќе стартува на 30 август, а во групата „Ф“ ќе се соочи со Австрија и Кипар. Само најдобропласираната селекција ќе обезбеди место во квалификациите за ФИБА Евробаскет 2029.
