Тунискиот репрезентативец Усама Хосни и официјално ја продолжува кариерата во Франција, откако потпиша договор со прволигашот Шарт до летото 2028 година.
33-годишниот десен бек во францускиот клуб пристигнува по настапите за Еурофарм Пелистер, каде во изминатите две сезони беше дел од битолскиот тим и настапуваше и во Лигата на шампионите на ЕХФ. Во Шарт ќе ја засили десната бековска позиција заедно со Габин Мартинез.
Францускиот клуб во својата објава истакнува дека Хосни е ракометар со големо меѓународно искуство, препознатлив по силниот шут и ефикасноста од далечина, квалитети со кои треба да донесе дополнителен квалитет во составот.
Спортскиот директор на Шарт, Генади Соломон, не го криеше задоволството од ангажманот на тунискиот интернационалец.
„Многу сум среќен што го пречекуваме Усама во редовите на С’Шарт Метропол Хендбол. Неговото искуство, посветеност и дефанзивни квалитети ќе бидат вистински адут за нашиот тим. Тој е играч со карактер и борбен дух, што совршено се вклопува во менталитетот кој сакаме да го изградиме оваа сезона“, изјави Соломон.
За Хосни ова ќе биде враќање во францускиот шампионат, каде претходно настапуваше за Иври, Понто-Комбо и Истр, пред да се пресели во македонскиот шампионат. Во дресот на Еурофарм Пелистер освои домашни трофеи и беше дел од настапите на клубот во најелитното европско клупско натпреварување.
Искусниот десен бек е стандарден репрезентативец на Тунис и зад себе има настапи на големи меѓународни натпреварувања, а со новиот ангажман во Шарт ќе се обиде да остави нов белег и во француската елита.
