Вечерва беа одиграни полуфинални мечеви по кои се познати екипите кои ќе настапат во големото финале на турнирот во мал фудбал „Петровден 2026“ во Мешеишта, како и екипите кои ќе се борат за освојување на третото место.
АСП Пак со триумф од 3:1 над Златара Бени Ерол обезбеди место во големото финале. Резултатот го отвори искусниот Мишо Ѓорѓески по само пет минути игра, а противникот успеа преку Сундим Фејза во 13. минута да погоди за 1:1 на полувреме.
Во вториот дел имаше голема неизвесност и борба на теренот, а мечот го реши Стефан Петрушески со два гола во 32. и 35. минута за конечни 3:1.
Во вториот меч Хотел и Спа Инекс Олгица го торпедираше составот на Др. Баткоски, особено во последните седум минути кога беше скршен отпорот на „стоматолозите“.
Александар Ѓорѓиески доминираше на овој меч со хет-трик, а по еден гол постигнаа Енгин Реџепи и Оливер Дишилиески.
Ѓорѓиески во 18. минута погоди за 1:0 на полувреме. Во вториот дел дури во 33. минута погоди Енгин Реџеп за двојна предност, а потоа во 34. минута Ѓорѓиески со втор гол и погодокот на Оливер Дишлиески резултатот беше 4:0. Во 37. минута Ѓорѓиески комплетираше хет-трик за конечни 5:0.
Во големото финале ќе се соочат две охридски екипи – Хотел и Спа Инекс Олгица ќе го предизвикува АСП Пак, а пак Златара Бени Ерол против Др. Баткоски во битка за третото место.
Утре ќе биде слободен ден на турнирот, а последниот натпреварувачки ден ќе биде во недела.
Програмата за финалниот ден нуди два атрактивни натпревари. Од 21 часот се игра натпреварот за трето место меѓу Златара Бени Ерол и Др. Баткоски.
\ 
Во 22:30 часот ќе биде супер-дерби пресметката меѓу АСП Пак и Хотел и Спа Инекс Олгица.
Спортска Мрежа и годинава е медиумски покровител на овој спортски настан, кој го има своето 51. издание.
