Возбудливи и драматични осминафинални пресметки на турнирот „Петровден 2026“ во Мешеишта, уште три екипи обезбедија „виза“ за влез во четвртфиналната фаза.
Драматичен меч одиграа АСП Пак и Кафе Бар Коко откако се покажаа пеналите кобни за играчите на „Коко“ и ги завршија настапите во Мешеишта.
Регуларниот дел понуди одличен меч за верната публика, Мишо Ѓорѓиески во 9. минута го отвори мечот за водство на АСП Пак од 1:0, резултат со кој се замина на пауза.
Во вториот дел одново искусниот Ѓорѓиески беше пресуден кој погоди по вторпат за двојна предност во 30. минута од средбата, но само една минута неговиот тим си постигна автогол за 2:1 и со тоа се врати неизвесноста околу пласманот во следната фаза.
Во 38. минута Ване Никодиноски успеа да го шокира противникот за конечни 2:2 во регуларниот дел во самиот финиш за ерупција на трибините во Мешеишта.
Пенал серијата беше повеќе од фантастична. За екипата на АСП Пак стрелаа Никола Угриноски, Кипријан Петрески, Шенол Меди, Дејан Милошески и одново Угриноски и Петрески, а пак за Кафе Бар Коко стрелаа Александар Бакулески, Албнор Каба, Ване Никодиноски и пак Абазоски и Бакулески.
Каков меч одигра Охридски Бисер Филеви – публиката беше сведок на неверојатен пресврт и шок за Нова Пор по водство од два гола за три минути прими три гола и го загуби мечот со 3:2, па така „бисерите“ патуваат во четвртфиналето, а пак Нова-пор ги „пакува куферите“ за дома.
По чистите мрежи во првиот дел, во второто полувреме Андреј Тулески во 22. минута погоди за водство на Нова-пор од 0:1, а во 35. минута Хадис Парталко ја дуплираше предност. Иако, многумина на трибините во Мешеишта мислеа дека мечот е решен, сепак се случи неверојатно чудо на теренот.
Во 37. минута екипата на Нова-пор си постигна автогол, а веќе во 38. минута Давид Лиотоски погоди за 2:2, на помалку од 60 секунди до крајот Христијан Маркоски успеа да го пронајде патот до мрежата и постигна гол за ерупција, славје и победа на Охридски Бисер Филеви од конечни 3:2 и пласман во четвртфиналето.
Вистински шок и неверување беше елиминацијата на Нова-пор.
Екипата на Др. Баткоски со сигурни 3:1 обезбеди пласман во четвртифналето исфрлајќи го Оровник од игра за следна фаза.
„Стоматолозите“ на полувреме имаа предност од два погодоци преку Филип Баткоски кој во 14. минута го отвори резултатот, а три минути подоцна Фоне Мурџески погоди за двојна предност на пауза.
Во вториот дел Мартин Ашталкоски во 25. минута погоди за 2:1 и ја врати неизвесноста до 38. минута кога Никола Шекуткоски погоди за конечни 3:1.
Тоа значи дека вечерва екипите на АСП Пак, Охридски Бисер Филеви и Др. Баткоски обезбедија четвртфинале, откако вчера тоа им успеа на Аце Најдески и Хотел и Спа Инекс Олгица.
Утре се играат три натпревари. Во 20:30 часот Гранит Х оди на мегдан против Златар Бени Ерол. Еден час подоцна Сатеска ќе го предизвикува тимот на Гостилница кај Мече, а пак во 22:30 стартува пресметката меѓу Чардак Велгошти и Етно ресторан Дедо Димо.
Спортска Мрежа и годинава е медиумски покровител на турнирот во мал фудбал „Петровден 2026“, а годинава турнирот во Мешеишта го има своето 51. издание.
