Брегалница минатата сезона стана шампион во Втората македонска фудбалска лига и обезбеди враќање во елитата.
Еден од најзаслужните за ваквиот успех беше младиот офанзивен играч од средниот ред, Лука Георгиев, кој со своите настапи беше вистински мотор на штипскиот состав. 22-годишниот фудбалер ги решаваше дерби натпревари кога се освојуваа најважните бодови за остварувањето на целите со силни конкурентни.
Токму неговиот еврогол против Охрид кога „сините“ ги добија „рибарите“ со минимални 1:0 во Штип, како и асистенцијата за победата над Скопје, беа моменти што ја одбележаа сезоната, а важна улога одигра и во дуелите со Шкендија Арачиново, каде Брегалница ги освојуваше клучните бодови на патот кон првото место, откако во гости „сините“ беа подобри, а дома одиграа нерешено.
Георгиев претходно се развиваше низ фудбалски академии во Германија, а во домашниот фудбал настапуваше за Осогово од Кочани, АП Брера Струмица и радовишки Детонит Плачковица, пред да пристигне во Брегалница и да ја има својата најдобра сезона досега.
Според информации на Спортска Мрежа, веќе има конкретен интерес од клубови од Скандинавија, поточно од Данска и Шведска. Интересот доаѓа како резултат на неговите одлични настапи и клучната улога во враќањето на Брегалница во елитата, за што и самиот фудбалер потврдува за Спортска Мрежа.
Зад Лука Георгиев е исклучително успешна сезона, а сега следува период во кој ќе треба да донесе важна одлука за продолжување на кариерата – дали ќе остане во домашниот фудбал или ќе направи трансфер во странство, каде веќе има отворени понуди од северот на Европа.
