Искусниот македонски фудбалер Јорданчо Наумоски повеќе не е дел од Брегалница, откако по завршувањето на сезоната 2025/2026 заврши неговата соработка со штипскиот клуб. По само шест месеци минати во сино-белиот дрес, прилепчанецот ќе бара нов предизвик и нов клуб за претстојната сезона.
Наумоски пристигна во Брегалница во јануари 2026 година како едно од клучните зимски засилувања, со задача да внесе искуство и стабилност во средниот ред во борбата за враќање на клубот во елитното македонско фудбалско друштво.
Неговото доаѓање се покажа како вистински потег. Со своето богато искуство, лидерски квалитети и сигурни настапи, Наумоски даде значаен придонес во шампионската сезона на Брегалница, која ја освои титулата во Втората македонска фудбалска лига и обезбеди враќање во Првата лига.
За Наумоски тоа беше уште еден голем успех во богатата кариера. Со освојувањето на шампионската титула со Брегалница, искусниот играч ја запиша својата петта промоција од Втората во Првата македонска фудбалска лига, редок подвиг со кој уште еднаш потврди дека важи за еден од најуспешните фудбалери кога станува збор за борбата за пласман во елитата.
Претходно двапати избори промоција со Победа, по еднаш со Тиквеш и Пелистер, а Брегалница стана петтиот клуб со кој успеа да обезбеди прволигашки статус.
Фудбалската кариера Наумоски ја започна во 11 Октомври од Прилеп, а како млад талент беше дел и од академијата на дански Брондби. Во својата кариера настапуваше и за Металург, Победа, Тиквеш и Пелистер, градејќи репутација на искусен и сигурен играч.
Иако неговата епизода во Брегалница траеше само половина сезона, Јорданчо Наумоски остави значаен белег во тимот од Штип, помагајќи им на „сините“ повторно да станат прволигаши. По успешната мисија, двете страни тргнуваат по различни патишта, а искусниот играч наскоро се очекува да го избере својот нов клуб за сезоната 2026/2027, со оглед на тоа што веднаш се става на радарот на неколку екипи кои се заинтересирани за неговиот потпис.
