Македонската фудбалска репрезентативка Наташа Андонова има нов клуб и кариерата ќе ја продолжи во швајцарскиот шампион Сервет. Со овој трансфер, една од најдобрите македонски фудбалерки ќе добие нов предизвик во својата богата интернационална кариера.
Триесет и двегодишната Андонова зад себе има импресивна кариера, настапувајќи за реномирани европски клубови како Потсдам, Розенгард, Барселона, Леванте, Пари Сен Жермен, Ал Шабаб, а последен клуб ѝ беше шпанскиот Мадрид CFF. Во текот на годините се етаблираше како една од најквалитетните македонски фудбалерки и беше лидер на женската репрезентација на Македонија.
Во новата сезона Андонова ќе има можност да се бори и за настап на најголемата европска сцена. Нејзиниот нов клуб Сервет го очекуваат квалификациите за пласман во групната фаза од Лигата на шампионите, каде швајцарскиот шампион ќе се обиде да обезбеди место меѓу европската елита.
Искусната македонска репрезентативка ќе биде едно од главните засилувања во амбициите на тимот за успешен настап на домашната и меѓународната сцена.
