Младиот стратег Иван Варадиновски е нов тренер на второлигашот Новаци, денес и официјално двете страни пуштија рака за соработка за сезона 2026/2027.
Новаци има амбициозен проект со план за напредок и развој, а во целата приказна се вклопува Варадиновски, кој зад себе остави одлични резултати во своите клубови кои во минатото ги водеше.
Варадиновски беше тренер на Кожуф, со кој клуб ја оствари целта – опстанок во Втора лига, претходно го водеше Детонит Плачковица и важеше за тренер кој немаше пораз на домашен терен, а не прими ниту гол, во сезона кога заврши на третото место во Втора лига со радовишкиот тим и играше историски бараж за Прва лига против скопски Вардар.
Претходно, 37-годишниот стратег ги водеше Каменица Саса и Кит Го од Пехчево.
„Ми беше претставен амбициозен и сериозен проект и верувам дека заеднички ќе направиме многу позитивни нешта. Клубот расте на секој план во последните неколку години. Можам да ветам дека максимално ќе се вложам за да ја оправдам дадената доверба и се надевам дека ќе имаме успешна сезона“, рече Варадиновски во ексклузивна изјава за Спортска Мрежа.
Според информациите на Спортска Мрежа, Варадиновски прозивката ќе ја има на 8 јули, а веќе се утврдуваат и пријателските натпревари за проверка на формата.
Минатата сезона Новаци заврши на седмото место, а годинава ќе цели кон висок пласман и сигурно е дека ќе се „вмеша“ во местата за Прва лига.
