Второлигашот АП Брера Струмица го назначи Ѓорѓе Стојчев за нов шеф на стручниот штаб во пресрет на новата натпреварувачка сезона. Станува збор за искусен стратег кој добро ја познава клупската средина, а со својата работа во изминатиот период ги оправда очекувањата на раководството.
Стојчев зад себе има исклучително успешна сезона како предводник на младинскиот тим на Брера, со кој ја освои двојната круна, триумфирајќи и во првенството и во Купот. Со тие резултати ја потврди својата стручност и способност за работа со млади фудбалери, што беше една од главните причини клубот да му ја довери првата екипа.
Подготовките за новата сезона ќе започнат на 13 јули, кога е закажан првиот тренинг на сениорскиот тим. Во текот на подготвителниот период Брера ќе одигра пет контролни натпревари, преку кои стручниот штаб ќе ја темпира формата на фудбалерите, ќе испроба различни тактички варијанти и ќе го воигра составот пред стартот на новата сезона.
Во клубот веруваат дека со Стојчев на клупата на Брера ќе продолжи со развојот на младите фудбалери и ќе состави тим каде ќе биде конкурентен во борбата за што подобри резултати во ВМФЛ.
