Дивејн Стјуард Јуниор на најдобар начин го најави своето присуство во дресот на македонската репрезентација. На првиот настап, во контролниот натпревар против Бугарија, новото засилување покажа дека може да биде важен дел од тимот во завршницата од претквалификацискиот циклус за Европското првенство во 2029 година.
Со само неколку тренинзи со новите соиграчи, Стјуард веднаш ја презеде одговорноста на теренот. За повеќе од 30 минути игра постигна 26 поени, а придодаде и пет скока и пет асистенции, демонстрирајќи го офанзивниот квалитет и енергијата која може да ја донесе во составот.
Одличната индивидуална партија на Стјуард донесе дополнителен оптимизам во македонскиот табор, каде очекуваат тој да биде еден од главните адути во претстојните дуели и да помогне репрезентацијата да ги оствари зацртаните цели.
„Ова е мое прво искуство во еден национален тим и секогаш сакам да го дадам најдоброто од себе. Спремен сум да работам со соиграчите и да помогнам во секој посед на топката, секој потег на теренот и секој детал во кошаркарската игра“, порача Стјуард по дебито.
Контролниот дуел со Бугарија беше само подготовка за она што следува. Пред Македонија се последните два натпревари од групата „А“ во претквалификациите – домашниот дуел против Ирска на 2 јули во Скопје, а потоа гостувањето кај Луксембург три дена подоцна.
„Целта е да ги победиме следните два натпревари. Ќе се бориме да го направиме тоа и да бидеме најдобрата верзија на теренот“, додаде Стјуард.
