Македонските Дејвис куп репрезентативци Калин Ивановски и Олег Приходко продолжуваат со одличните настапи на ИТФ М25 турнирот во Загреб, откако со две победи во четвртфиналето обезбедија место меѓу четворицата најдобри тенисери на турнирот.
Ивановски во уште еден исцрпувачки меч го совлада третиот носител, Шпанецот Хавиер Баранко Косано, со 2-0 во сетови (7:6(4), 7:5). Идентично како и во претходното коло, македонскиот тенисер славеше без загубен сет, а до триумфот стигна по два часа и 35 минути игра. Во првиот сет двајцата тенисери направија по еден брејк, по што Ивановски беше посмирен во тај-брејкот. Решавачкиот момент во вториот сет се случи во 12. гем, кога македонскиот тенисер направи брејк и го завери пласманот во полуфиналето.
Сигурен настап имаше и Олег Приходко, кој за само 90 минути го совлада Гркот Димитрис Сакеларидис со 2-0 во сетови (6:4, 6:3). Приходко го контролираше натпреварот во текот на двата сета и заслужено обезбеди место во следната рунда.
Во полуфиналето Ивановски ќе игра против победникот од дуелот меѓу Божо Барун и Андреј Чепелев, додека Приходко за противник ќе го има подобриот од мечот Себастијан Зоргер – Кумоин Султанов.
Покрај настапот во сингл конкуренција, Калин Ивановски денеска ќе игра и во полуфиналето на турнирот во двојки. Заедно со Амар Хусеиновиќ, македонскиот тенисер ќе се соочи со грчката двојка Елефтериос Неос и Петрос Циципас, во обид да избори место и во финалето.
