Актуелниот шампион Форца доби уште едно големо и важно дерби на патот кон одбрана на титулата во Првата футсал лига, откако со 2:3 славеше над Шкупи на гостински терен.
Даниел Марињо Де Соуза по само две минути донесе водство за Форца од 0:1, а веќе во 5. минута Еркан Сефери постигна гол за 1:1. Во вториот дел со двата гола на Иван Крстевски екипата на Форца дојде до предност од 1:3. Во финишот Исмет Цека ги постави конечните 2:3.
Железарец на домашен терен претрпе пораз откако беше поразен од тимот на Осогово со 2:4. Во првиот дел немаше погодоци, а сите шест беа постигнати во вториот дел.
Флажевски и Цветковски беа стрелци за домашниот тим, а пак Риствоски, Станојковски, Ангеловски и Тодоровски беа стрелци за гостинската екипа од Крива Паланка.
Марио Атанасовски сам го победи Бутел и ги обезбеди трите бодови за неговиот Кеги Моби, откако велешани со 5:6 беа подобри.
Токму Атанасовски беше стрелец на пет гола, а Иван Николовски постигна еден гол за гостинот. За домашниот тим Ќендрим Абази беше двоен стрелец, а по еден гол постигнаа Филип Јаневски, Ненад Тодоровски и Владимир Трендафиловиќ.
Претходно како што информираше Спортска Мрежа екипата на Јувентус Серава забележа голема победа над фаворитот Проект, а колото ќе се комплетира во среда со градското дерби во Кавадарци меѓу Клими и Црна Река.
