Прволигашот Тиквеш продолжува со засилувањата за новата сезона, а најново име во редовите на кавадаречкиот прволигаш е 24-годишниот голман Марко Алчевски. Македонскиот чувар на мрежата официјално стави потпис на договор со Тиквеш кој ќе има важност до летото 2028 година.
Алчевски важи за еден од перспективните голмани од својата генерација, а во Кавадарци пристигнува со богато искуство стекнато како на домашната, така и на меѓународната сцена. Своите први фудбалски чекори ги направи во Брера Струмица, од каде го започна развојот на својата кариера. Потоа настапуваше и за Борец, каде доби можност за дополнителен напредок и натпреварувачко искуство.
Добрата форма му донесе и интернационален ангажман, па кариерата ја продолжи во израелскиот Хапоел Ерусалим, а потоа и во српскиот ОФК Београд. Настапите во странство му овозможија да стекне дополнително искуство и да се развива во различни фудбалски средини.
Со ангажманот на Алчевски, Тиквеш добива квалитетно решение на голманската позиција и уште едно важно засилување во пресрет на новата натпреварувачка сезона. Во клубот очекуваат неговото искуство, квалитет и амбиција да придонесат за остварување на поставените цели и за што подобри резултати во домашното првенство.
