Во Негорски Бањи денеска започнува новото издание на развојниот кошаркарски камп, кој е дел од заедничкиот проект на ФИБА и Кошаркарската федерација на Македонија, насочен кон најмладите и најперспективни кошаркарски таленти од земјава.
Во периодот до 27 јуни, вкупно 60 млади кошаркари и кошаркарки од генерациите 2013 и 2014 година ќе учествуваат во четиридневна програма исполнета со интензивни тренинзи, едукативни сесии и активности за развој на техничко-тактичките вештини.
Кампот ги обединува најдобрите млади таленти во машка и женска конкуренција, избрани по претходно спроведена стручна селекција, со цел работа во професионална спортска средина и унапредување на нивниот потенцијал.
Во машка конкуренција, со избраната група од 15 кошаркари ќе работи стручниот тим предводен од тренерот Мартин Атанасовски, заедно со помошниците Мартин Анчевски и Никола Димитриевски.
Кај девојките, 15-те избрани кошаркарки ќе бидат под водство на тренерскиот тим составен од Никола Петровски, Сара Стојановска и Јована Стојанова.
Овој развоен камп претставува значаен сегмент од стратегијата за унапредување на младите кошаркарски категории во Македонија, со цел навремено препознавање и развој на генерации кои во иднина ќе го носат дресот на националните селекции.
