Македонскиот атлетски репрезентативец Огнен Стефановски оствари извонреден резултат на Балканското првенство кое се одржува во Волос, Грција, поставувајќи нов национален рекорд во дисциплината десетобој.
Стефановски собра вкупно 7.207 поени, со што го подобри досегашниот македонски рекорд и уште еднаш го потврди својот квалитет како еден од најдобрите повеќебојци во регионот. Во силна конкуренција од најдобрите балкански атлетичари, македонскиот репрезентативец го освои одличното четврто место.
Одличен настап забележа и Андреас Трајковски, кој го освои четвртото место во скок во далечина во исклучително силна конкуренција. Македонскиот репрезентативец до висок пласман стигна со скок од 7.68 метри, резултат кој уште еднаш ја потврдува неговата стабилна форма и континуитет на големите меѓународни натпреварувања. Трајковски во текот на целата сезона бележи одлични резултати и останува еден од најдобрите македонски атлетичари во оваа дисциплина.
Настапите на Стефановски и Трајковски се уште една потврда за напредокот на македонската атлетика и добра најава за претстојните големи натпреварувања на кои ќе ги бранат боите на Македонија.
