Машката одбојкарска репрезентација на Македонија го заврши настапот во Европската лига 2026 со биланс од три победи и три порази. На последниот турнир во Приштина, нашите одбојкари остварија победа над Косово и претрпеа пораз од Израел, со што го заокружија првиот дел од квалификацискиот циклус за Европското првенство 2028.
Македонија го отвори турнирот со убедлива победа над домаќинот Косово од 3:0 (25:12, 25:19, 27:25). Избраниците на селекторот Миленкоски доминираа во првите два сета, додека во третиот сет мораа да вложат дополнителни напори за да го скршат отпорот на противникот. Иако Косово имаше предност во завршницата, македонските одбојкари успеаја да израмнат на 23:23 и потоа да ја реализираат првата меч-топка за максимален триумф.
Капитенот Никола Ѓоргиев беше најефикасен со 15 поени, Стојан Илиев додаде 11, а Филип Савовски 8 поени.
Во вториот натпревар Македонија загуби од фаворизираниот Израел со 3:0 (25:19, 25:19, 25:14). Нашите репрезентативци пружија силен отпор во првите два сета и долго време беа резултатски рамноправни, но не успеаја да го нарушат ритамот на противникот. Израел ја потврди својата класа и заслужено стигна до победата.
Никола Ѓоргиев повторно беше прв реализатор со 15 поени. Филип Савовски освои 7, Стојан Илиев 5, а Лука Костиќ и Кристијан Илијев по 3 поени.
Со завршувањето на Европската лига, Македонија го комплетираше првиот репрезентативен предизвик ова лето. Нашата селекција го завршува натпреварувањето на 16. место со девет бодови, ист број како Хрватска и Словачка.
Репрезентативците ќе имаат кратка пауза, а повторно ќе се соберат на 5 август во Крушево, каде ќе започнат подготовките за настапот на Европското првенство 2026 во Софија.
