Женската одбојкарска репрезентација на Македонија го заврши настапот во Европската лига 2026 без освоен бод, забележувајќи шест порази во исто толку натпревари.
Во последните два меча од натпреварувањето, одиграни во СЦ „Борис Трајковски“ во Скопје, македонските одбојкарки беа поразени од селекциите на Хрватска и Словенија со идентични 3:0.
По завршувањето на првата фаза од квалификациите за Европското првенство 2028, Македонија се наоѓа на 24. место во генералниот пласман без освоен бод. Во истата група на екипи со нула бодови се и Грузија, Албанија и Исланд, кои имаат подобар сет и поен-количник.
Во последниот натпревар, Словенија ја оправда фаворитската улога и славеше со 3:0 (25:15, 25:10, 25:10). Македонските репрезентативки најголем отпор пружија во првиот сет, во кој имаа предност од 12:10, но гостинките направија серија за пресврт и сигурно го приведоа сетот во своја корист. До крајот на натпреварот Словенките целосно доминираа и без загубен сет ја завршија лигашката фаза.
Најефикасни во македонскиот состав беа Ана Фасулева со седум и Андротеа Милевска со шест поени.
На отворањето на турнирот во Скопје, Македонија загуби и од Хрватска со 3:0 (25:15, 25:12, 25:15). Во тој натпревар Андротеа Милевска освои седум поени, Љиља Ковачевиќ и Мила Дикова по пет, додека Ива Стојкоска и Ана Фасулева постигнаа по четири поени.
Следниот предизвик за македонската репрезентација ќе бидат Медитеранските игри 2026 во Таранто, Италија. Репрезентативките повторно ќе се соберат на 27 јули во Скопје, кога ќе започнат подготовките за настапот на ова натпреварување.
