Македонскиот прволигаш Тиквеш започна со сериозна реконструкција на тимот за новата сезона, по промените во раководната структура на клубот.
Новото раководство, предводено од првиот човек на клубот Сезар Браво, веќе реализира значајни промени во играчкиот кадар со цел создавање поконкурентен состав за претстојната натпреварувачка сезона. Од клубот најавуваат дека реконструкцијата ќе продолжи и во наредниот период.
Македонскиот прволигаш Тиквеш продолжува со големите промени во играчкиот кадар, откако клубот официјално ја прекина соработката со дури 11 фудбалери.
Од тимот заминуваат: Даниел Мојсов, Стефан Тасев, Мартин Тодоров, Милован Петровиќ, Даниел Тасев, Кристијан Ѓорѓиевски, Кристијан Стојкоски, Мартин Стојанов, Никола Најдовски, Берат Садик и Вања Терзиќ. Дел од нив ќе продолжат со нови кариерни предизвици, при што Никола Најдовски ќе ја продолжи кариерата во Косово, додека Берат Садик ја заврши својата професионална фудбалска кариера.
Паралелно со играчките промени, клубот доби и ново тренерско водство. Нов стратег на Тиквеш е Оливер Богатинов, тренер со богато интернационално искуство. Во својата кариера работел во неколку словенечки клубови, меѓу кои Марибор и Копер, а во 2012 година бил дел и од стручниот штаб на репрезентацијата на Словенија до 17 години.
Со овие потези, Тиквеш јасно најавува нов почеток и темелна реконструкција на тимот пред стартот на новата сезона.
