Женската кошаркарска репрезентација на Македонија до 17 години со убедлива победа го отвори настапот на „Rising Stars“ турнирот во Букурешт, совладувајќи ја селекцијата на Молдавија со високи 95:27.
Избраничките на селекторот Виктор Петровски доминираа од почетокот до крајот на натпреварот. Македонија уште во првата четвртина најави убедлив триумф, откако поведе со 24:5, а до полувремето ја зголеми предноста на 46:18.
Во второто полувреме нашите млади кошаркарки продолжија во ист ритам. Особено убедлив беше третиот период кој Македонија го доби со 29:5, со што практично го реши победникот и стигна до првиот триумф на турнирот.
Дури пет македонски кошаркарки натпреварот го завршија со двоцифрен број на поени. Најефикасни беа Колева, Гриева и Карајованова со по 17 поени, Пислевска постигна 12, додека Трајковска додаде 10 поени.
Во следното коло Македонија ќе се соочи со селекцијата на Грција. Натпреварот е закажан за утре од 16:00 часот по локално време.
