Капитенот Филип Кузмановски и во наредната сезона ќе го носи дресот на Еурофарм Пелистер. Битолскиот клуб потврди дека македонскиот репрезентативец ја продолжил соработката со „зелено-белите“, на големо задоволство на навивачите.
Иако за Кузмановски постоеше интерес и од странство, искусниот бек одлучи да остане во Битола и да продолжи да биде еден од лидерите на тимот. Така, Еурофарм Пелистер и во новата сезона ќе смета на својот капитен, кој веќе неколку години е еден од заштитните знаци на клубот.
Во изминатиот период Кузмановски настапуваше како позајмен играч за Кувајт Клуб, каде што учествуваше на Азискиот шампионат. По краткиот интернационален ангажман, тој повторно се враќа во редовите на битолчани, кои подготовките за новата сезона ќе ги започнат во јули под водство на новиот тренер Лино Червар.
Кузмановски по вторпат го носи дресот на Еурофарм Пелистер. Тој се врати во Битола во 2023 година, а претходно настапуваше за Металург и Еурофарм Работник. Во својата кариера стекна и богато меѓународно искуство играјќи во Германија за Магдебург, Хановер и Вецлар.
