СВР Струмица преку Надворешната канцеларија за криминалистички работи Валандово поднесе кривична пријава против К.С. (66) и М.Г. (54), двајцата од Валандово, поради сомнение за сторени кривични дела „измама во службата“ и „фалсификување службена исправа“.
Според информациите од Министерството за внатрешни работи, првопријавениот во својство на претседател, а второпријавениот како секретар на Општинскиот фудбалски сојуз Валандово, во периодот од 2021 до 2025 година во повеќе наврати регистрирале фудбалски клубови за натпреварување во Општинската фудбалска лига Валандово без да бидат исполнети условите за минимален број играчи предвидени со правилниците на Фудбалската федерација на Македонија.
На овој начин, како што наведува полицијата, бил зголемен бројот на делегати во Собранието на ФФМ, на кои им биле исплаќани надоместоци по различни основи. Со ваквите дејствија, според пријавата, за себе и за други лица била прибавена противправна имотна корист од околу 1.350.000 денари.
Дополнително, пријавените се сомничат дека изготвувале записници за наводно одиграни натпревари во кои внесувале невистинити податоци за учесници на фудбалски средби кои воопшто не биле одиграни.
