Македонскиот футсал шампион КМФ Проект продолжува со задржувањето на костурот на тимот кој минатата сезона испиша историја, откако клубот ја продолжи соработката со Трајче Димитриев и за сезоната 2026/2027.
Од клубот од Јосифово истакнуваат дека Димитриев е еден од играчите кои континуирано напредуваат и го градат својот пат во зелено-црниот дрес.
Со својата дисциплина, посветеност и професионален однос, тој претставува важен дел од сегашноста, но и иднината на КМФ Проект.
Димитриев се издвојува со својата цврстина во дефанзивата, сигурност во дуелите и подготвеност секогаш да го стави тимскиот интерес пред личниот. Токму тие квалитети му носат доверба од стручниот штаб и раководството на клубот.
„Трајче Димитриев и во наредната сезона останува дел од КМФ Проект. Трајче е човек кој чекор по чекор го гради својот пат во нашиот клуб, пример за дисциплина, принципиелност и посветеност. Цврст во дефанзивата, сигурен во дуелите и секогаш подготвен да го стави тимот пред себе. Веруваме дека најдобрите денови за Трајче допрва доаѓаат, а ние сме горди што неговиот развој и иднина се врзани токму со КМФ Проект. Заедно продолжуваме“, велат од клубот.
Минатата сезона КМФ Проект ја освои двојната круна во македонскиот футсал, откако по вторпат во својата историја стана шампион на Македонија, а за првпат го освои и Купот на Македонија.
Во новата сезона клубот ќе биде македонски претставник во квалификациите за Лигата на шампионите, каде ќе се обиде да оствари нов историски успех.
