Македонската машка сениорска кошаркарска репрезентација во понеделник (15 јуни) ќе ги започне подготовките за претстојните натпревари од претквалификациите за пласман во квалификациите за Евробаскет 2029.
Првиот собир на националниот тим е закажан за 10 часот во спортската сала „Лазар Лечиќ“ во Скопје. Со овој собир официјално започнува третиот дел од претквалификацискиот циклус, во кој Македонија ќе се натпреварува во „А“ групата заедно со Ирска и Луксембург.
Селекторот Жозеп Мариа Берокал објави поширок список на кошаркари, во кој се вклучени и неколку нови имиња што досега немаа настап за сениорската репрезентација. Намерата е стручниот штаб одблиску да ги процени нивните квалитети и потенцијал во пресрет на идните репрезентативни предизвици.
Подготовките ќе се реализираат во Скопје, а главниот фокус ќе биде ставен на дуелите против Ирска и Луксембург. Во текот на подготовките ќе биде донесена и конечната одлука околу натурализираниот кошаркар кој ќе биде во конкуренција за настап за националниот тим.
Македонија првиот натпревар ќе го одигра на 2 јули против Ирска, додека три дена подоцна, на 5 јули, ќе гостува кај селекцијата на Луксембург.
Поширок список на играчи за ФИБА „прозорец“
- Ненад Димитријевиќ – Баерн Минхен-Германија
- Андреј Јакимовски – Тренто – Италија
- Адем Мекиќ – Задар – Хрватска
- Лејсон Зеќири – Башкими – Косово
- Валмир Какруки – Сигал Приштина – Косово
- Резарт Мемед – Бора – Косово
- Андреј Шошкиќ – НЦАА-САД
- Павел Иванов – НЦАА – САД
- Војдан Стојановски – МЗТ Скопје Аеродром
- Андреј Маслинко – МЗТ Скопје Аеродром
- Марин Петков – МЗТ Скопје Аеродром
- Виктор Ташовски – ТФТ
- Страхил Николов – ТФТ
- Стојан Ѓуроски – МКК Куманово
- Мухамед Тачи – Чаир 2030
- Рубин Стефанов – Ангели
- Виктор Ефремовски – Работнички
- Андреј Митревски – Пелистер
- Лука Стојановски – Пелистер
- Никола Бојчев – Кожув
- Теодор Симиќ – Кожув
- Амар Хот – Маџари
- Марко Луканоски – Маџари
- Петар Бошалески – Тиквеш Голден Игл
- Михаил Наумоски – Феникс 2010
