Македонската тениска двојка составена од Александар Грујиќ и Селим Кемал Јилдиз го освои трофејот на турнирот Поинтер Опен 2026 за тенисери и тенисерки до 16 години. Во финалниот меч тие славеа против Тим Максимилијан Фрајсе од САД и Вукашин Павловиќ од Србија по голем пресврт и неизвесна борба.
Противниците подобро го отворија натпреварот и го добија првиот сет со 6:2. Сепак, македонската комбинација возврати во вториот сет, кој го реши во тај-брејк со 7:6 (7:5), а потоа беше поуспешна и во решавачкиот шампионски тај-брејк, славејќи со 10:7.
Во машка сингл конкуренција победник беше Патрик Стефан Добрин од Романија, кој во финалето со 2-0 во сетови (6:2, 6:3) го совлада Максимилијан Хајцик од Германија. Од македонските претставници, Андреј Темов стигна до полуфиналето, додека Александар Грујиќ го заврши настапот во четвртфиналето.
Кај девојчињата, титулата во сингл ја освои Хариклеа Зина од Грција, која во финалето беше подобра од Зара Минева од Бугарија со 2-0 во сетови (6:4, 6:1). Зина имаше успешен настап и во двојки, каде заедно со сонародничката Христина Цевелеку стигна до уште еден трофеј.
Од македонските тенисерки, Лина Николовска обезбеди пласман во четвртфиналето, а заедно со Анастасија Арсовска настапи и во полуфиналето на турнирот во двојки.
Поинтер Опен 2026 беше турнир од категорија 3, а дел од учесниците веќе следната недела ќе настапат на уште еден турнир од истата возрасна категорија, кој ќе се одржи во Кавадарци на терените на ТК Црна Река.
