Македонската одбојкарска репрезентација го победи Исланд со 3:0 на турнирот во Атина, Грција, во рамките на Европската лига.
Нашата репрезентација одигра одличен натпревар, каде избраниците на Јошко Миленковски прикажаа квалитетна и сигурна игра. Македонија до победата стигна со сетови 25:21, 25:23 и 25:19, покажувајќи стабилност и концентрација во клучните моменти од мечот.
Со оваа победа го запишаа вториот триумф во новата сезона, по оној над Луксембург во Струмица.
Најефикасен во македонскиот состав беше капитенот Никола Ѓорѓиев со 24 поени, додека Лука Костиќ додаде 10. Кај Исланд најрасположен беше Торарин Орн Јонсон со 13 поени.
Утре македонската одбојкарска репрезентација ќе го одигра својот следен натпревар во Европската лига против селекцијата на Грција.
Домаќинот ќе ја има улогата на фаворит во овој дуел, но избраниците на Јошко Миленковски ќе имаат можност уште еднаш да покажат дека можат рамноправно да се носат и со најсилните репрезентации. По убедливата победа над Исланд, македонските одбојкари со дополнителна самодоверба ќе влезат во новиот предизвик.
Натпреварот меѓу Македонија и Грција е закажан за утре со почеток во 19:00 часот.
