Македонската тениска репрезентација обезбеди промоција во Втората Светска група откако денеска во Кишињев, во натпреварот за третото место, ја совлада селекцијата на Црна Гора со 2-1.
Одлучувачкиот поен за Македонија го донесе двојката составена од Калин Ивановски и Олег Приходко, кои во мечот на двојки славеа против Петар Јовановиќ и Алекса Кривокапиќ со 2-0 во сетови (7:6(4), 6:2).
Во првиот сет двата тандема беа сигурни на свој сервис, па победникот беше решен во тај-брејк. Македонските тенисери направија клучен мини-брејк и поведоа со 3:1, а стекнатата предност ја зачуваа до крајот за освојување на сетот со 7:4 на поени. Во вториот сет Ивановски и Приходко рано направија брејк, а со уште еден во осмиот гем ја потврдија победата и успешниот настап на турнирот во Молдавија.
Претходно, во првиот сингл натпревар, Калин Ивановски беше подобар од Срѓан Кнежевиќ со 2-0 во сетови (6:2, 6:4), додека Олег Приходко беше поразен од Петар Јовановиќ со 2-0 (6:4, 7:5).
Ова беше седми меѓусебен дуел меѓу Македонија и Црна Гора во Дејвис купот, а македонската репрезентација сега води со 4-3 во вкупниот биланс.
Во борбата за првото место, Молдавија ја совлада Летонија со 2-0. Во останатите натпревари за пласман, Грузија беше подобра од Азербејџан со 2-0, додека Република Ирска го победи Косово со идентични 2-0.
Покрај Македонија, пласман во Втората Светска група обезбедија и Молдавија и Летонија. Во Третата Европска група остануваат Црна Гора, Грузија и Република Ирска, додека Косово и Азербејџан се селат во Четвртата Европска група.
