Првиот викенд од годинешното издание на Европската лига 2026 за женската одбојкарска репрезентација на Македонија започна со два порази, од селекциите на Унгарија и Португалија, на турнирот во Порто.
Избраничките на селекторот Милош Гавриловиќ прикажаа променлив настап, со добри и послаби периоди во играта, но на крајот противничките репрезентации успеаја да ја оправдаат улогата на фаворити и да стигнат до победите.
„Анализирајќи ги двата натпревари кои се зад нас можам да кажам дека сум задоволен од пристапот на одбојкарките на првиот натпревар во Европската лига. Знаевме дека Унгарија е поквалитетен тим од нас, но успеавме да им парираме во повеќето елементи. Ќе го издвојам сервисот со кој успеавме да ја ‘исфрлиме“ од игра една од нивните најдобри играчи. Во финишот на сетовите индивидуалните квалитети на унгарските одбојкарки дојдоа до израз и им донесоа позитивен резултат“, анализира Милош Гавриловиќ и продолжува „Што се однесува до дуелот со Потругалија, не покажавме ни 15 посто од она што го демонстриравме на првиот меч, бидејќи сметам дека можеме да играме егал со Потругалките. Мора да признаам дека тие се многу физички поподготвени од нас, а и не успеавме да го смириме нивниот серви и со тоа беше многу тешко да се организира контра напад. Немавме ниту решение за нивниот блок… Истовремено видовме и дека сме далеку од ривалите и потребно е време и многу работа за да направиме исчекор напред. Факт е дека репрезентативките на противниците играат во сериозни клубови низ Европа и светот и тоа дополнително влијае.“
Македонската делегација вечерва од Порто патува за Аликанте, каде престојниот викенд ќе се одигра вториот турнир од годинешното издание во Евролигата. Покрај домаќинот Шпанија, нашите одбојкарки ќе се соочат и со селекцијата на Азербејџан.
„Од овие два порази мора да извлечеме само поуки и да се потрудиме на престојниот турнир да го кренеме нивото на игра. По рејтинг и по квалитет сите противници кои ги имаме оваа година се подобри, но ние ќе се бориме и ќе се обидеме да го дадеме најдоброто од нас на секој натпревар. Собираме искуство, растеме и ќе се трудиме да бидеме тврд конкурент за секој“, заклучува селекторот.
На вториот турнир во Аликанте, Македонија првиот меч го игра на 12 јуни од 19:30 часот против домаќинот Шпанија, додека ден подоцна од од 18:30 часот ќе се соочи со Азербејџан
