Првата македонска одбојкарска судијка со меѓународна ЦЕВ значка, Елеонора Петровска, направи уште еден значаен чекор во својата кариера. На стартот од Европската лига 2026 таа ја доби својата прва номинација за судење натпревари од ова престижно репрезентативно натпреварување.
Петровска беше дел од судискиот тим на турнирот број три, кој се одржа во Струмица, каде што домаќини беа Одбојкарската федерација на Македонија и машката сениорска репрезентација. Со оваа номинација таа уште еднаш ја потврди својата позиција меѓу најперспективните македонски одбојкарски арбитри на меѓународната сцена.
На турнирот во Струмица, Петровска судеше заедно со искусните меѓународни арбитри Александрос Милонакис од Грција, Ерол Акбулут од Турција и Лучиан Настасе од Романија, стекнувајќи дополнително драгоцено искуство на европско ниво.
Македонската судијка го имаше главниот збор на дуелот меѓу Холандија и Луксембург, додека на мечот меѓу Македонија и Луксембург таа беше втор судија.
Петровска пред една година доби статус на ЦЕВ интернационален судија, а во сезоната 2025/2026 имаше неколку делегирања во европските клупски купови, а во април годинава судеше и на квалификации за ЕП У18 мажи.
