Македонскиот футсал шампион КМФ Проект продолжува да го задржува костурот на тимот кој испиша историја минатата сезона, а најновата потврда пристигна со продолжувањето на соработката со капитенот Марио Благојевски.
Репрезентативецот на Македонија и најдобар стрелец на Проект ќе продолжи да го носи дресот на клубот и во сезоната 2026/27, во која екипата повторно ќе има високи амбиции на домашната и европската сцена.
Минатата сезона беше историска за КМФ Проект. Тимот по вторпат стана шампион на Македонија, а до титулата стигна без ниту еден пораз. Покрај шампионскиот трофеј, Проект за првпат ја освои и двојната круна, откако триумфираше и во Купот на Македонија.
Од клубот со посебна порака го потврдија останувањето на својот капитен.
„Со големо задоволство објавуваме дека нашиот капитен Марио Благојевски ќе го носи дресот на КМФ Проект и во сезоната 2026/27. Неговото лидерство, посветеност и борбен дух се симбол на вредностите што ги градиме како клуб. Продолжуваме заедно кон нови предизвици, нови победи и нови успеси на домашната и европската сцена. Капитене, благодарам за довербата. Да пишуваме нови страници од нашата заедничка историја“.
Со задржувањето на Благојевски, КМФ Проект испраќа јасна порака дека сака да остане на врвот на македонскиот футсал и во сезоната што следува, а капитенот ќе биде еден од главните адути во остварувањето на новите клупски цели.
Пред Проект следуваат квалификациите во Лигата на шампиони.
