Навивачите на Охрид не сакаат лесно да се разделат со човекот кој за кратко време стана еден од симболите на европскиот успех на клубот. Тие покренаа петиција со која бараат Косуке Јасухира да остане дел од тимот и во следната сезона, а воедно и да добие македонско државјанство.
Јапонскиот среден бек пристигна во Охрид во текот на пролетниот дел од сезоната, но експресно се вклопи во екипата. Со своите игри и лидерска улога во организацијата на нападот, Јасухира брзо ја освои довербата на стручниот штаб, соиграчите и публиката.
Во моментите кога управата на клубот и ракометарот ги водат разговорите за евентуално продолжување на соработката, поддржувачите на Охрид решија јавно да покажат колку им значи неговото присуство во тимот.
Токму Јасухира беше еден од најзаслужните за историскиот резултат на охриѓани оваа сезона. Охрид го освои трофејот во ЕХФ Европскиот куп, откако во финалниот двомеч беше поуспешен од унгарска Татабања и ја испиша најсветлата страница во клупската историја.
Петицијата е достапна на овој линк.
