Женската фудбалска репрезентација на Македонија забележа голема победа на гостувањето кај Андора, откако во рамки на квалификациите славеше со минимални 0:1. Херој на триумфот беше Павлинка Николовска, која во 86. минута со вистински проектил од слободен удар од околу 40 метри ја затресе противничката мрежа и донесе три вредни бодови за Македонија.
По натпреварот, селекторот на македонската репрезентација Александар Андов не го криеше задоволството од прикажаното на неговите избранички, потенцирајќи дека успехот добива уште поголема вредност ако се земе предвид младоста на составот.
„Голема победа за нашата женска репрезентација! Со можеби еден од најмладите состави во Европа, во кој настапуваат и девојки од само 16 години, а најголемиот дел од тимот е составен од фудбалерки на 19 години, овие млади спортски хероини покажаа карактер, квалитет и огромно срце. Андора е исклучително незгоден противник на домашен терен и докажа дека може да им создаде проблеми и на многу посилни репрезентации. Токму затоа оваа победа има уште поголема тежина и покажува дека оваа генерација има светла иднина. Горд сум на овие девојки, на стручниот штаб и на сите што работат за развојот на женскиот фудбал во Македонија. Голема благодарност и до Фудбалската федерација на Македонија и претседателот Масар Омерагиќ за поддршката и вербата во овој проект“, рече селекторот Александар Андов.
Македонија до победата стигна по голема борба и дисциплинирана игра, а токму погодокот на Николовска ќе остане запаметен како еден од најубавите во овој квалификациски циклус. Со овој триумф македонските фудбалерки уште еднаш покажаа дека поседуваат голем потенцијал и дека пред нив стои светла иднина.
Победата во Андора е дополнителна потврда дека проектот за подмладување на репрезентацијата носи резултати, а младите македонски фудбалерки од натпревар во натпревар покажуваат дека можат рамноправно да се носат со европските селекции и да бидат гордост на македонскиот спорт.
