Македонската женска фудбалска репрезентација забележа победа од минимални 0:1 над репрезентацијата на Андора во гости, во рамки на квалификациите за Светското првенство.
По чистите мрежи во првиот дел (0:0), Македонија создаваше свои можности за да го загрози голот на противникот, а голот дојде во 86. минута од средбата кога Павлинка Николовска постигна погодок за триумф од минимални 0:1.
Девојките на Александар Андов ја забележаа својата втора победа во квалификациите, откако одново ја добија Андора, овој пат во гости, на првото соочување на домашен терен нашата репрезентација беше подобра со 3:0.
Македонија одигра одличен меч во кој постојано правеше притисок кон голот на противникот, самата статистика доволно говори за тоа. Испратени вкупно 20 удари кон голот на Андора, десет во рамки на голот, од кој еден успеа Николовска да претвори во погодок.
Следен предизвик ќе биде на домашен терен против Азербејџан, а мечот е закажан за 9 јуни.
