Македонски судиски тим предводен од судијката Ирена Велевачкоска ќе ја дели правдата на натпреварот од Лигата Ц, Група 2 во рамките на женската Лига на нации помеѓу репрезентациите на Бугарија и Гибралтар.
Средбата ќе се одигра утре со почеток од 17:00 часот на стадионот „Славија“ во Софија. Покрај Велевачкоска, во судискиот тим од Македонија се и помошничките Вјолца Изеири и Тамара Цветановиќ, додека улогата на четврти судија ќе ја извршува Ангела Рајчевска.
Ова претставува уште едно значајно меѓународно назначување за македонските арбитри под капата на UEFA, што е потврда за нивниот квалитет, професионалност и континуиран напредок на европската сцена.
Воедно, ваквите назначувања се и признание за посветената работа на судиската организација и Фудбалска федерација на Македонија, која преку континуирана едукација и развој на судискиот кадар придонесува македонските арбитри сè почесто да добиваат доверба за натпревари од меѓународен ранг.
