Ракометната федерација на Македонија донесе одлука за промена на местото на одигрување на бараж натпреварот за пласман во машката Супер лига, кој првично беше закажан во спортската сала „25 Мај“ во Радовиш.
Според официјалното соопштение на РФМ, натпреварот меѓу РК Струга и РК Младост наместо во Радовиш ќе се одигра во спортската сала „Антон Димитров“ – Бутел во Скопје, на 3 јуни 2026 година со почеток од 19:00 часот.
Од Федерацијата истакнуваат дека одлуката е донесена со цел обезбедување на највисоко ниво на транспарентност, еднакви услови за натпреварување и непречена организација на бараж натпреварите.
Во меѓувреме, бараж натпреварот во женска конкуренција меѓу ЖРК Пелистер 2012 и МРК Ѓорче Петров 2 останува во претходно утврдениот термин и локација. Овој дуел ќе се игра на 3 јуни во спортската сала „25 Мај“ во Радовиш со почеток од 17:30 часот.
И двата бараж натпревари ќе бидат директно пренесувани на МРТ, а од РФМ им посакаа успех на сите екипи и фер, коректна и спортска борба на теренот.
