Историската титула во Европскиот Куп донесе голема радост во редовите на Охрид, а еден од ракометарите кои дадоа значаен придонес во европскиот успех, столбот во одбраната на Охрид, Ориол Реј Моралес, не го криеше задоволството по освоениот трофеј. Во изјава за Спортска Мрежа, тој истакна дека важноста на натпреварот и огромните очекувања влијаеле врз емоциите на екипата во почетните минути од финалето.
Моралес смета дека тимот го започнал натпреварот со голема возбуда, свесен за значењето што овој меч го имал за клубот, градот и навивачите. Сепак, и покрај почетната еуфорија, Охрид успеал да ја задржи контролата врз случувањата на теренот и да замине на паузата со предност.
„Мислам дека првото полувреме го започнавме доста возбудено, бидејќи знаевме дека ова е нешто многу важно за градот, за навивачите, за сите нас. Исто така, за многу од нас ова беше и прва европска титула..прв европски трофеј, па затоа започнавме можеби еуфорично, меѓутоа и покрај тоа имавме контрола над мечот и на полувреме заминавме со гол предност.“
Шпанскиот ракометар посочи дека во соблекувалната тимот разговарал за потребата од уште подобра игра во продолжението. Според него, токму посмирениот и посериозен пристап во второто полувреме бил клучот за победата и освојувањето на европскиот пехар.
,,На паузата, зборувавме дека играме добро, но мораме уште подобро, како што знаеме. Во вториот дел почнавме посериозно и посмирено..па мислам дека не можеше подобро од ова да ја завршиме оваа одлична сезона.”- изјави Моралес за Спортска Мрежа.
Освојувањето на Европскиот Куп претставува круна на една извонредна сезона за Охрид. Со историскиот успех, Моралес и неговите соиграчи испишаа ново поглавје во клупската историја и им донесоа незаборавна радост на навивачите.
