Струмица од следната сезона повторно ќе има градско фудбалско дерби, но во рамките на Втората македонска фудбалска лига.
Екипата на Брера Струмица не успеа да го задржи прволигашкиот статус, откако во бараж натпреварот загуби од Скопје со минимални 0:1. Со оваа победа, „пиратите“ од Автокоманда обезбедија враќање во елитното друштво, додека струмичани се преселија во второлигашката конкуренција.
Така, по неколкугодишна пауза, љубителите на фудбалот во Струмица повторно ќе имаат можност да следат градско дерби меѓу Беласица и Брера, кое сигурно ќе привлече големо внимание во текот на новата сезона.
Брера, поранешен освојувач на Купот на Македонија и клуб кој настапуваше и на европската сцена, ќе се обиде експресно да се врати во Првата лига, додека Беласица и натаму ќе ги негува своите амбиции за враќање меѓу најдобрите.
Во сезоната 2026/27, Струмица ќе има два свои претставници во Втората македонска фудбалска лига, но за првпат по подолго време нема да има клуб во прволигашката конкуренција.
