Радовиш и македонскиот кик-бокс добија уште една причина за гордост, откако младиот натпреварувач Љупчо Крстев освои сребрен медал на Балканското првенство кое викендов се одржа во Нови Сад, Србија.
Крстев, кој е член на Кик-бокс клубот Адреналин од Радовиш, настапи во составот на македонската репрезентација под организација на WAKO и остави одличен впечаток на своето прво учество на едно вакво големо меѓународно натпреварување.
Радовишанецот успеа да стигне до финалето и да го освои второто место, закитувајќи се со сребрен медал на Балканскиот шампионат.
Од Кик-бокс клубот Адреналин не го криеја задоволството од успехот на својот натпреварувач, истакнувајќи дека Крстев достојно ги претставувал Македонија, својот клуб и родниот Радовиш.
Особено значајно е што ова беше негов прв настап на Балканско првенство, каде покажа исклучителен стил на борење, самодоверба и квалитет кој ветува уште многу успеси во иднина.
Освоениот сребрен медал претставува големо признание за вложениот труд на младиот спортист, но и за работата на Кик-бокс клубот Адреналин, кој продолжува да создава успешни натпреварувачи и достојно да го претставува Радовиш на домашната и меѓународната сцена.
Балканското сребро на Љупчо Крстев е само потврда дека пред него стои светла спортска иднина, а воедно и мотив за нови предизвици, успеси и медали во годините што следуваат.
