Спортската сала „25 Мај“ во Радовиш на 3 јуни ќе биде центарот на македонскиот ракомет, откако Ракометната федерација на Македонија официјално потврди дека токму таму ќе се одиграат бараж натпреварите за пласман во Супер лигата во машка и женска конкуренција.
Програмата започнува од 17:00 часот со женскиот бараж натпревар, во кој силите ќе ги одмерат ЖРК Пелистер 2012 и Ѓорче Петров 2. Битолчанки ќе се борат за опстанок во суперлигашкото друштво, додека екипата од Ѓорче Петров 2 ќе се обиде да избори пласман во елитната конкуренција.
Во вечерниот термин од 19:30 часот ќе се игра машкиот бараж дуел помеѓу РК Струга и РК Младост 1977 од Богданци. Стружани ќе атакуваат на опстанок во Супер лигата, а амбициозниот состав од Богданци ќе се обиде да обезбеди враќање меѓу најдобрите македонски ракометни екипи.
Се очекуваат два неизвесни и возбудливи натпревари со огромен влог, бидејќи победниците ќе обезбедат место во Супер лигата за следната натпреварувачка сезона.
