Еурофарм Пелистер со победа ја затвори сезоната и го обезбеди второто место во домашниот шампионат, откако во Битола го совлада Алкалоид со 31-26. Со овој триумф, битолчани обезбедија место во групната фаза од Европската лига на ЕХФ и ја исполнија главната цел пред крајот на сезоната.
Натпреварот започна подобро за гостите од Скопје, кои преку цврста игра и сигурна реализација поведоа со 0-3. Домашниот состав имаше проблеми во нападот и не реализираше ниту еден од трите пенали во воведните минути. Сепак, Пелистер постепено го фати ритамот и се врати резултатски, иако Алкалоид во еден момент повторно стигна до највисоки „плус три“ (9-12).
Дополнителен проблем за гостите беше повредата на поранешниот пелистерец- Урош Борзаш, кој по еден незгоден доскок мораше да го напушти теренот, поради повреда. До паузата битолчани успеаја да ја намалат негативата и на одмор заминаа со само еден гол заостанување (14-15).
Клучниот момент се случи на стартот од второто полувреме, кога Алкалоид влезе во серија технички грешки, а Пелистер тоа максимално го искористи за комплетен резултатски пресврт. Одбраната на Саид Хаидаридад внесе сигурност, додека Радивојевиќ и соиграчите во нападот донесоа предност која постојано растеше.
Во продолжението домашниот тим целосно ја контролираше играта и со неколку врзани голови стигна и до четири гола разлика, што беше доволно за мирен финиш и големо славје во салата „Боро Чурлевски“.
Најефикасен кај победникот беше Филип Кузмановски со седум погодоци, а значајна улога имаше и голманот Хаидаридад со осум одбрани во второто полувреме. Кај Алкалоид, Дамјан Митев постигна седум гола, додека Филип Николов натпреварот го заврши со пет реализации.
