ГРК Охрид в недела ќе го одигра најважниот натпревар во својата историја, реванш- финалето од ЕХФ Европскиот Куп против МОЛ Татабања. По големата победа во Унгарија, охриѓани се на чекор до европскиот трофеј, а атмосферата во градот веќе е вистински спектакл, откако билетите за натпреварот беа распродадени за рекордно кратко време.
Во пресрет на реваншот, од таборот на охриѓани- Давид Савревски за Спортска Мрежа, порача дека позитивниот резултат од првиот меч не смее да создаде опуштање кај тимот, бидејќи финалната битка допрва следува. Тој нагласи дека клучот за успехот ќе биде цврстата одбрана, борбата за секоја топка и заедништвото во тимот, додека огромна мотивација ќе биде и поддршката од полните трибини во „Билјанини Извори“.
„Во недела нè очекува финале против Татабања. Од Унгарија се вративме со позитивен резултат, но работата сè уште не е завршена. Сега нè очекува реваншот на домашен терен. Салата е целосно распродадена, што значи дека ќе уживаме да играме пред нашите навивачи. Клучна за победа, сметам дека ќе биде одбраната, како и борбата за секоја топка и тимскиот дух. Ние одиме на победа и да го освоиме трофејот!”- изјави Савревски за Спортска Мрежа.
Во недела од 20:00 часот, „Билјанини Извори“ ќе биде центарот на европскиот ракомет. Охрид ќе ја има поддршката од преполната сала, а навивачите ќе имаат задача уште еднаш да бидат осмиот играч и да му помогнат на тимот заедно да испише историја и да го донесе европскиот пехар во Македонија.
