Македонскиот ракомет испраќа во заслужена пензија една од најпознатите и најдолговечни судиски двојки. Прилепчаните Рубинчо Седлоски и Горан Ангелески официјално ставија крај на својата богата судиска кариера, оставајќи зад себе импресивни 27 години активен стаж и повеќе од 900 отсудени натпревари.
Низ речиси три децении поминати на ракометните терени ширум Македонија, Седлоски и Ангелески беа препознатливи по професионалниот пристап, авторитетот, смиреноста и почитта кон играта. Судиската двојка остави длабока трага во домашниот ракомет и беше дел од бројни значајни натпревари во македонските ракометни натпреварувања.
Одлуката за повлекување ја споделија преку социјалните мрежи, каде емотивно се заблагодарија на сите што биле дел од нивниот пат.
„По 27 години активен судиски стаж и повеќе од 900 отсудени натпревари, од срце сакам да упатам голема благодарност до сите кои беа дел од мојот пат. Благодарам на ракометните клубови, играчите, тренерите и колегите судии за довербата, почитта и поддршката во текот на сите овие години.
Благодарам на Ракометната федерација на Македонија за укажаната можност и верата во мојата работа. На моето семејство најголема благодарност за разбирањето, трпението и поддршката која ми беше најважна.
Ракометот ми даде многу пријателства, искуства, емоции и незаборавни моменти. Ќе останам засекогаш посветен на овој спорт во кој ја оставив својата душа.
Ви благодарам на сите!“, напиша Седлоски.
Судиската двојка Седлоски – Ангелески важеше за симбол на стабилност и професионалност во македонскиот ракомет. Нивната долгогодишна работа беше почитувана од клубовите, играчите и спортската јавност, а нивното име останува запишано како дел од ракометната историја во Македонија.
Иако повеќе нема да ги гледаме со свирче на терените, двајцата и понатаму ќе останат дел од ракометот, но во нова улога – како делегати и контролори.
