Третолигашот Борец, со поддршка од Општина Велес, организира бесплатен автобуски превоз за сите навивачи, симпатизери и љубители на фудбалот за бараж натпреварот против Кожуф од Гевгелија за влез во Втората македонска фудбалска лига.
Натпреварот ќе се одигра во Кочани, а велешани очекуваат голема поддршка од трибините во обидот да обезбедат експресно враќање во второлигашката конкуренција. Борец сезонава ја освои шампионската титула во Третата лига – Југ и сега преку баражот ќе се обиде да направи камбек во Втората лига против искусниот второлигаш Кожуф од Гевгелија.
Од клубот информираат дека организатор на натпреварот е Фудбалската федерација на Македонија, а цената на билетот за влез изнесува 200 денари. Секој навивач ќе треба самостојно да обезбеди влезница, додека дополнителни информации околу продажбата ќе бидат објавени во наредниот период.
Поради потребата од список на патници, сите заинтересирани за организираниот превоз треба да се пријават со име и презиме во порака, најдоцна до петок (29 мај 2026) до 22:00 часот.
Поаѓањето е закажано во 15:00 часот од паркингот во кругот на Гимназијата во Велес, спроти ЕВН.
Во Велес владее голема мобилизација пред важниот бараж натпревар, а пораката од клубот е јасна – „Да го обоиме Кочани во црвено!“
Борец во минатото настапуваше и во Првата македонска фудбалска лига.
