Младиот, но веќе докажан македонски фудбалер Анџело Николовски продолжува да испишува успешни страници во својата кариера. Со шампионската сезона на Брегалница во Втората македонска фудбалска лига, 24-годишниот Николовски по четврти пат успеа да избори промоција во елитното друштво на македонскиот фудбал.
За Николовски ова е вторпат да слави пласман во Првата лига токму со Брегалница, а штипскиот клуб сезонава го подигна и шампионскиот пехар во второлигашката конкуренција. Претходно, ист ваков успех оствари и со Македонија Ѓорче Петров, додека со Гостивар обезбеди влез во Првата лига како второпласирана екипа.
Тоа значи дека Николовски зад себе веќе има четири промоции во Првата македонска фудбалска лига и три шампионски трофеи во Втората лига — импресивен учинок за фудбалерот од Штип.
Николовски е поранешен младински репрезентативец на Македонија и фудбалер кој низ годините се наметна како исклучително корисен играч на теренот. Настапува на позициите лев бек и лево крило, а речиси секоја сезона зад своето име има голови и асистенции, потврдувајќи дека станува збор за фудбалер кој знае да решава натпревари.
Со Брегалница настапуваше и во Првата македонска фудбалска лига, а во својата кариера остави силен белег и во редовите на Детонит Плачковица. кога во историската сезона играа бараж за влез во Прва лига против Вардар.
Токму во тој период Николовски се етаблираше како еден од најстандардните и највлијателни фудбалери во тимот, оставајќи длабока трага во една од најзначајните сезони за клубот од Радовиш.
Четири промоции, три трофеи и бројни важни натпревари зад себе — Анџело Николовски полека, но сигурно се вбројува меѓу најуспешните македонски фудбалери кога станува збор за второлигашките успеси и борбата за место во елитата.
