Шкупи ја имаше најтешката сезона во својата историја: Само еден бод и негативни рекорди во ПМФЛ

Екипата на Шкупи зад себе остави сезона за заборав во Првата македонска фудбалска лига, откако чаирчани испишаа низа негативни рекорди и сезоната 2025/2026 ја завршија на последното место на табелата.

Клубот од Чаир во текот на целата сезона се соочуваше со сериозни финансиски проблеми и забрани за трансфери, поради што најголемиот дел од натпреварите ги одигра со младински состав. Тешката ситуација во клубот директно се одрази и врз резултатите на теренот.

Шкупи сезоната ја заврши без ниту една победа, со само едно реми и дури 32 порази на 33 одиграни натпревари, освојувајќи само еден бод. Со тоа, чаирчани официјално станаа најслабиот тим во историјата на Првата македонска фудбалска лига, уривајќи го неславниот рекорд на Тиквеш од сезоната 2000/2001, кога кавадаречкиот тим освои три бодови.

Особено загрижувачки изгледаа бројките во дефанзивата. Шкупи прими неверојатни 130 погодоци, што е убедливо најлош одбранбен учинок во лигата. За споредба, вторите најслаби одбрани ги имаа Работнички со 58 примени голови, Македонија ЃП со 57 и Брера Струмица со 56, што доволно говори за катастрофалната сезона на чаирскиот состав.

Проблемите беа очигледни и во нападот, каде Шкупи постигна само 15 погодоци во текот на целата сезона, што дополнително ја отсликува тешката и резултатски најцрна сезона во клупската историја.

Некогашниот шампион на Македонија по само неколку години од европските настапи и борбата за титули, сега се соочува со голем предизвик и неизвесна иднина по испаѓањето во Втората македонска фудбалска лига.