По големата победа над МОЛ Татабања во првиот меч од финалето на ЕХФ Европскиот Куп, охриѓани повторно се враќаат на обврските во домашниот шампионат. Пред реваншот за европскиот трофеј, тие утре ќе го одиграат последниот натпревар од плеј-офот во Супер Лигата против ГРК Тиквеш.
Иако првично натпреварот требаше да се игра во Кавадарци, поради напорниот финален меч, патувањето за Унгарија и густиот распоред пред реваншот, дуелот ќе се одигра во салата „Билјанини извори“, каде Охрид ќе се обиде сезоната во домашното првенство да ја затвори со позитивен резултат.
Во пресрет на средбата, левиот бек од редовите на Охрид- Дејан Кукуловски посочи дека тимот нема многу време за подготовка по европскиот натпревар, но и покрај тоа очекува максимален ангажман против младиот и борбен состав на Тиквеш, со цел сезоната во Супер Лигата да заврши со уште една победа.
„После натпреварот со Татабања ни следува и последниот натпревар од домашното првенство против екипата на Тиквеш. Станува збор за млада и борбена екипа, па нѐ очекува еден тежок натпревар за кој немаме многу време за подготовка, но ќе излеземе максимално мотивирани и ќе го дадеме нашиот максимум за да ја завршиме сезоната во домашното првенство со уште една победа.“- изјави Кукуловски.
Натпреварот помеѓу ГРК Охрид и ГРК Тиквеш се игра утре од 17:00 часот во „Билјанини Извори“, по што вниманието на охриѓани целосно ќе биде насочено кон реваншот за европската титула.
